കവര്‍ന്നെടുത്താലും
സുഗന്ധം സ്വഭാവമാവില്ലെന്ന്
പൂവ്, കാറ്റിനോട്

വരച്ചിട്ടവയല്ല,
വരയുകയാണ് പാതരേഖകള്‍,
വഴിവിളക്കുകള്‍

മരീചികകള്‍
ഗ്രീഷ്മപ്പനിയില്‍ പൊള്ളുന്ന
പാതയറ്റങ്ങളില്‍

കണിയൊരുക്കി, കണ്ടു
കണ്ണിലെല്ലാം, കണ്ടതി-
ല്ലെന്‍ മനസ്സിലൊന്നും

തണുപ്പിക്കുന്നുണ്ട്,
മഴയോട് തെറ്റി വന്ന 
കുളിര്‍ക്കാറ്റ്

കാഴ്ചകളെ പിന്നിലാക്കി ഞാന്‍ ഓടുമ്പോള്‍ 
മേഘങ്ങളില്‍ ഒളിഞ്ഞും തെളിഞ്ഞും 
കൂടെയുണ്ട് ചെറുചിരികളുടെ നിലാവെട്ടം

ഊഞ്ഞാലാടുന്നുണ്ട്,
ഓര്‍മ്മപ്പൂമരത്തില്‍ ഒരു 
മാമ്പഴക്കാലം

വേനലിന്റെ മധുരമൂറ്റി
വസന്തമാക്കുന്നുണ്ട് 
ഈന്തപ്പനക്കാടുകള്‍