കവലകള്‍ക്ക്
വഴി പിരിയലുകളുടെ 
അമ്പരപ്പാണ്

രാവില്‍ കൊഴിഞ്ഞ 
സ്വപ്നങ്ങളാണ് പൂക്കളായി 
രാജപാത തീര്‍ത്തത്

മലയിറങ്ങിയ

കോടമഞ്ഞില്‍ പാട കെട്ടിയ

നിലാവ് 

കയ്യകലത്തിലെങ്കിലും

നമുക്കിടയില്‍ നക്ഷത്രദൂരമെന്നു

പൂവ് ശലഭത്തോട്

മടി പിടിച്ച മരങ്ങളെ

കിക്കിളി കൂട്ടി കടന്നു പോകുന്നു-
ണ്ടൊരു കുളിര്‍ക്കാറ്റ്

പടര്‍ന്ന പച്ചപ്പില്‍
ഇല പൊഴിഞ്ഞൊരൊറ്റ മരം
ചിതലരിച്ച ചിന്തകള്‍

മനസ്സിലിറങ്ങിയ മഞ്ഞിന്

ഓര്‍മ്മകളുടെ മരണത്തിന്റെ

തണുപ്പ് 

ഊതിയണച്ചീടാം,

ദീപനാളമെന്നാല്‍ അണയുകി-

ല്ലതിന്‍ വെളിച്ചമുള്ളില്‍

മുഖമിരുളുന്നുണ്ട്,

ഇടിനാദമൊന്നുള്ളില്‍ കുറുകുന്നുണ്ട്, എന്നിട്ടും

പെയ്യുന്നില്ലീ കണ്ണീര്‍മേഘങ്ങള്‍ 

ചിറകു വിരിയാതെ 
കൊക്കൂണിനകത്തെ ശലഭം പോലൊരു 
സൗഹൃദം, മനസ്സിലൊരു വിങ്ങല്‍

നീലമേഘങ്ങള്‍,
മലമുകളില്‍ ഉറയൂരിയാണ്
വെണ്‍മേഘങ്ങളായത്

മണമുള്ളൊരുമ്മയും
ഇതള്‍ വിടര്‍ന്ന ചിരിയുമായൊരു ചെമ്പകപ്പൂ
ജാലകത്തിനപ്പുറത്ത്

വെയിലുദിച്ചെന്നിട്ടും,
കാറ്റില്‍, ലാസ്യനൃത്തമാടുന്നു,
മഴയൊന്നെന്നില്‍

വാക്കുകളാണ്
രൂപം വരയ്ക്കുന്നത്,
കാഴ്ചയല്ല

മൌനം കരുത്താണ്,
വാക്കുകള്‍ നിറയുമ്പോഴും
ഒഴിയുമ്പോഴും

മഴയുണ്ട് മുന്നില്‍,
ഉണര്‍വ്വിന്റെ ഊഷ്മളത-
യിലേയ്ക്കാണ് യാത്ര

പറന്നിറങ്ങിയ
മിന്നാമിനുങ്ങുനക്ഷത്രങ്ങള്‍
അകമൊരാകാശം പോല്‍

രണ്ടു യാത്രകള്‍ക്കിടയിലെ
ഇടവേളയിലാണ് ഓര്‍മ്മകളുടെ
നിലാപ്പെയ്ത്ത്

തിളയ്ക്കുന്ന വെയില്‍,
മണ്ണൂര്‍ന്ന വേരില്‍ വിറയ്ക്കും വയസ്സന്‍
മരത്തിനു കീഴിലും തണല്‍

കവര്‍ന്നെടുത്താലും
സുഗന്ധം സ്വഭാവമാവില്ലെന്ന്
പൂവ്, കാറ്റിനോട്

വരച്ചിട്ടവയല്ല,
വരയുകയാണ് പാതരേഖകള്‍,
വഴിവിളക്കുകള്‍

മരീചികകള്‍
ഗ്രീഷ്മപ്പനിയില്‍ പൊള്ളുന്ന
പാതയറ്റങ്ങളില്‍

കണിയൊരുക്കി, കണ്ടു
കണ്ണിലെല്ലാം, കണ്ടതി-
ല്ലെന്‍ മനസ്സിലൊന്നും

തണുപ്പിക്കുന്നുണ്ട്,
മഴയോട് തെറ്റി വന്ന 
കുളിര്‍ക്കാറ്റ്

കാഴ്ചകളെ പിന്നിലാക്കി ഞാന്‍ ഓടുമ്പോള്‍ 
മേഘങ്ങളില്‍ ഒളിഞ്ഞും തെളിഞ്ഞും 
കൂടെയുണ്ട് ചെറുചിരികളുടെ നിലാവെട്ടം

ഊഞ്ഞാലാടുന്നുണ്ട്,
ഓര്‍മ്മപ്പൂമരത്തില്‍ ഒരു 
മാമ്പഴക്കാലം

വേനലിന്റെ മധുരമൂറ്റി
വസന്തമാക്കുന്നുണ്ട് 
ഈന്തപ്പനക്കാടുകള്‍

ഒരു നല്ല മഴയിലാണ്
പ്രകൃതിയും മനസ്സും 
വെളുത്തുപോവുന്നത്

സൌഹൃദങ്ങള്‍ അപ്പൂപ്പന്‍ താടികളാണ്
വേരുകള്‍ വേണ്ടാത്ത
സ്നേഹത്തിന്റെ വിത്ത് ചുമക്കുന്നവ

അടച്ചു വച്ച ഫ്ലാസ്കിലെ, 
ചായയുടെ അമര്‍ഷം 
രുചി കെട്ട സ്വാദ്...

പടിഞ്ഞാറേ ഉമ്മറത്തിണ്ണയില്‍ 
നടന്നു കയറിയ നിഴല്‍ 
പഴമനസ്സിലെ ഘടികാരം

തുറന്നിട്ട വാതിലിനപ്പുറം , 
പറന്നുയരാന്‍ ഒരു ആകാശം 
എന്നിട്ടും എനിക്കൊരു നിഷ്കാസിതയുടെ മനസ്സ്

മേഘമായ് പാറാം, കാറ്റില്‍ 
ഊയലാടാം, ഒന്ന്
മഴയായ് പെയ്യലാണ് കഠിനം

മോഹിച്ചു ഗര്‍ഭം ധരിച്ച
ഏകാന്തതയില്‍
അസ്വസ്ഥതയുടെ നിലവിളിക്കൂട്ടങ്ങള്‍ 

യാത്രയെന്നും മുന്നോട്ട്,
കണ്ടതെല്ലാം പിന്നോട്ട്,
വഴിയില്‍ കൊഴിയുന്ന സമയം

മനസ്സ് ദാഹം തീര്‍ത്തത് 
മരീചികയില്‍
നിറവില്ലാത്ത വാക്കുകള്‍

ഇന്ന്, മേഘങ്ങള്‍ മഞ്ഞായി തൊട്ടത്‌ 
മനസ്സിലാണ് 
അലിഞ്ഞു പോയത് വരച്ച രൂപങ്ങളും

മേഘങ്ങളില്‍ ഭാവം പകര്‍ന്നത് ഞാനാണ്,
ക്ഷണികം സുന്ദരം 
എന്നിട്ടുമെന്തേ അതെന്റെ സത്യമെന്ന് നീ ?!!!!

പുല്‍നാമ്പിലെ മഴത്തുള്ളി,
മായക്കണ്ണാടി
തെളിയുന്ന കൈരേഖകള്‍

മഞ്ഞില്‍ ദിക്ക് തെറ്റിയ കാറ്റില്‍
ചേര്‍ത്തു വച്ച മുഖത്താകെ 
തണുപ്പിന്റെ സൂചി മുറിവുകള്‍

ഇന്നലെ ...

കടല്‍ അരികിലെത്തിയ

അമ്പിളി വട്ടത്തിനായി

കൈനീട്ടി കരഞ്ഞ കുഞ്ഞ്

കടലിന്റെ മാറില്‍ പതഞ്ഞ്,

പനത്തലപ്പില്‍ ആഞ്ഞുലഞ്ഞ്,

ആര്‍ത്തലച്ചു പായുന്നുണ്ട്‌ പേക്കാറ്റ്

രാത്രിയില്‍ കടല്‍ കരഞ്ഞത്,

ഇരുളുന്ന ഓരോ മൌനത്തിലും 

ഒരു കടലിരമ്പുന്നുണ്ടെന്നാണ്

സ്വപ്നം,

 വരണ്ട മണ്ണിലെ നനവ്‌,

 ഇരുണ്ട മനസ്സിലെ 

 വെളിച്ചത്തിന്റെ ഒരു കീറ്

മഴ,

ജനാല ചില്ലിലെ വരകള്‍ ,

നിവര്‍ത്തിയ കുടയിലെ താളം,

എന്റെ മനസ്സിലെ നിറവ്

മേഘം നിറഞ്ഞ മാനം,

കറുത്ത കടല്‍,

ക്ഷുഭിത മനസ്സ്

എണ്ണയില്‍ ചാഞ്ഞ തിരി,
ഇരുളടഞ്ഞ്,
കെട്ടുപോയ സ്വപ്‌നങ്ങള്‍

മാനത്തു പാറുന്ന വെണ്‍മേഘത്തുണ്ട് 
എന്റെ മനമിന്നു 
ചിന്ത തന്‍ തടവറയിലെ കീറത്തുണ്ട്

മഴയൊഴിഞ്ഞ മാനത്തൊരു 
പെയ്യാന്‍ മറന്ന മേഘം 
ഉള്ളിലൊരു സങ്കടക്കടല്‍

മഞ്ഞില്‍ മഴവില്ലാകും കിരണം പോലെ 

മഞ്ഞപ്പട്ടില്‍ മതിമറന്നലിയുന്ന വെണ്ണ പോലെ

മദിക്കുന്ന പ്രണയമായ് ഒഴുകുന്നു നീയെന്നില്‍