ഇന്നെന്റെ മനസ്സ്

ഇന്ന്,
        കടല്‍ പുഴ പോലെ
        ചെറിയ കാറ്റില്‍ ചെറിയ ഓളങ്ങള്‍ തീര്‍ത്ത്
        മനം കടല്‍ പോലെ
        ചെറിയ ഓര്‍മ്മകളില്‍ വലിയ തിരകള്‍ തീര്‍ത്ത്
      

                                  

ഇരുള്‍ നീക്കി ഓരോ

മനസ്സിലുമുണരുമൊരു

സ്വപ്ന നിലാവ്

            

പടിഞ്ഞാറന്‍ മാനത്ത്

കാര്‍മേഘങ്ങളുടെ തിരശീലക്കു മുന്നില്‍

കടല്‍കാക്കകള്‍ തീര്‍ത്ത വെള്ളിരേഖകള്‍

കാഴ്ചകളുടെ പൂരം

                                    

ആതിരയായെന്നു വിളിച്ചുണര്‍ത്തി ജനലരികില്‍ അമ്പിളിവട്ടം,

ചിതറി വീണ നിലാവ് പെറുക്കി ഞാനിന്നെന്റെ വിളക്ക് കൊളുത്തി

                                                                            

മല നിറയെ മേഘങ്ങള്‍ തീര്‍ത്ത നിഴല്‍ ചിത്രങ്ങള്‍,
മനം നിറയെ നിന്റെ വാക്കുകള്‍ തീര്‍ത്ത വര്‍ണ്ണ ചിത്രങ്ങള്‍  

ഇരുള്‍ വിങ്ങും മാനത്ത് ,

നിലാവിന്റെ കൈകള്‍ മടക്കി,

യാത്രാമൊഴിയുമായി

പുലര്‍കാല ചന്ദ്രന്‍

                                                    

മുകിലിലൊളിപ്പിച്ച
സ്വപ്നത്തുണ്ടുകളാണ്  
മഴയില്‍ ഒലിച്ചു പോയത് 



                     

പകലിന്റെ അറുതിയില്‍,

പകലോന്റെ കരവിരുത് 

മേഘങ്ങളിലെ നിറച്ചാര്‍ത്ത്

                            

പ്രഭാതമായിട്ടും കാഴ്ചകളെ മറച്ച് മഞ്ഞിന്റെ പുതപ്പില്‍ കടലിനു നിദ്ര

സൂര്യന്‍ തന്റെ കരങ്ങളാല്‍ വിളിച്ചുണര്‍ത്തട്ടെ എന്നൊരു പ്രണയഭാവം

                                                             

ഒരു സ്വപ്നത്തുണ്ട്,

ഇന്നെന്റെ മനസ്സിനെ ആകാശച്ചെരുവിലെ
പഞ്ഞിക്കൂട്ടത്തില്‍ ചേര്‍ത്തു വച്ചു

                            

കടലിന്, കാറ്റ് സമ്മാനിച്ചത്
വെളുത്ത ഞൊറികളുള്ള നീലപ്പാവാട

പെയ്തു തീരാത്ത മഴയാണെന്റെ സ്വപ്നം

വാക്കുകള്‍ ഒഴിയാത്ത മനസ്സും

                                                    

എനിക്ക് ചുറ്റും മടുപ്പിന്റെ ചിതല്‍പ്പുറ്റ്

നേടുന്നത് നിശ്ചലമായ കാലത്തിന്റെ വിഴുപ്പ്

                     

ഉച്ച വെയില്‍ കാട്ടിയ വികൃതി 
കടല്‍ മുഴുവന്‍ തിളങ്ങുന്ന പളുങ്ക് മണികളായി